Романға Екінші Дүниежүзілік соғыс жылдарындағы ел басына түскен нәубет өзек болған. Жазушы ауыр кезеңді романның бас кейіпкері – Нәзираның басынан кешкен оқиғалары арқылы суреттеп берген. Шығармада көп қасірет көріп, азап шеккен, қиындықтың бәрін мойымай көтере білген қарапайым қазақ әйелі – Нәзираның қайтпас қайсарлығын танытып, соғыспен келген зұлымдыққа адами күш-қайратты қарсы қояды. Сондай-ақ автор қазақ елінің басынан кешкен ашаршылықты, сталиндiк асыра сілтеушілікті нанымды көрсетіп, романның құндылығын арттыра түскен.